Laurdag 10. september startar småviltjakta. Mange av dei 90 000 jegerane som skal ut og prøve lukka, har allereie klargjort hagle og ammunisjon. Klif ber dei hugse på at blyhagl er forbode.
Klima- og forureiningsdirektoratet (Klif) minner om at forbodet mot produksjon, import, eksport, omsetning og bruk av blyhagl som blei innførd i 2005, framleis gjeld.
– Bly er eit giftig tungmetall, og det er ikkje lov å bruke eller omsetje blyhagl i Noreg. Det er heller ikkje tillate å ta med blyhagl over landegrensa til personleg bruk, verken inn eller ut av landet, seier avdelingsdirektør Marit Kjeldby i Klif.
Blyhagl som spreier seg i naturen, kan bli ete av fuglar og andre dyr som dermed blir forgifta. Det er også fare for blyforgifting for menneske som et vilt som er skote med blyhagl.
Sist oppdatert 08.09.2011
